ATA y ARCP ta pidi publico pa cuida nos beach y lama durante e temporada di campamento

Oranjestad – Manera ta conosi caba tur aña ariba e promer weekend di Juli, e popular accion di limpieza di Aruba Reef Care Project lo tuma lugar. E aña aki ta di 14 aña consecutivo cu e comision di Aruba Reef Care di ATA ta organisa e campaña annual di conscientisacion y tambe e accion di limpieza cu ta culmina ariba e promer weekend di Juli. E fecha di e aña aki ta dia 7 y 8 di Juli, 2007.

Durante e añanan, e accion di limpieza di Aruba Reef Care a bira sumamente popular y ta conta cu gran cantidad di participante. E limpieza annual lo cubri e area for di Faro California pa Baby Beach. Lo bai tin participante cu lo haci limpieza den lama y otro gruponan lo dedica atencion na nos beachnan publico. E comision di Aruba Reef Care a bin cu e idea pa enfoca mas ariba e mucha di school. Mirando cu e aña aki tabata tin hopi interes di parti di scol pa traha proyectonan pa cu limpiesa di lama. Nos a bin cu e idea organisa un competencia di poster y lema.
Competencia di Poster y criteria

1. Tur alumno di un zesde klas di scol basico por participa.
2. Nan mester pinta nan poster ariba un papel poster size.
3. Por usa tur sorto di technica pa pinta verf, stif, etc.
4. E mester ta hopi colorido y por mira e detalles nan cla.
5. E topico di poster mester trata cu cuido di bida marina.
Aki nos ta ofrece un biaha mas tur e mucha nan di scol di zesde klas pa pinta un bonita poster y gana un premio.

Competencia di Lema y criteria
Pa loque ta trata e competencia di lema. E mucha nan tin oportunidad pa participa y crea un lema pa conscientisa henter nos comunidad ariba e importancia di cuida y preserva nos bida marina. E competencia ta dirigi tambe na e mucha di zesde klas. Nos regla nan cu nos a propone ta masha facil:
1. E lema mester ta scirbi na e idioma Papiamento
2. No mas di 15 palabra
3. E alumno mester inclui su nomber di scol, nomber completo, edad, adres, number di telefoon y cellular.
4. Cada alumno por entrega solamente un lema.

E lema por wordo manda via fax, email y e poster por wordu entrega personalmente na oficina di ATA na Eagle, e-mail: ata.aruba@aruba.com , m.lacle@aruba.com of c.perez@aruba.com Fax: 583-7403.