Esaki lo wordo transmiti Diadomingo awor.

Oranjestad,—Recientemente tabata na Aruba e celebridad Hulandes, Chris Zegers hunto cu e ekipo di televisión di e programa di viahe numer 1 na Hulanda pe ultimo 4 aña, esta RTL Travel Hotlist. E programa aki tin un audiencia di 600.000 televidente pa episodio cu ta varia entre 25 pa 45 aña.

ATA a ricibi e grato noticia cu e programa ta completamente edita y ta cla pa wordo transmiti dia 25 di Februari pa loke ta trata e parti luhoso y dia 25 di Maart pa loke ta trata e parti tradición y culinario. Tur cu tin familiares na Hulanda por informa nan encuanto di esaki y asina nan por aprecia un tiki di e calor di Aruba.

Kiko lo ta e structura di e programa:
E programa lo cuminsa cu Chris, preparando pa bin Aruba, mientras cu den background caba nan ta bay mustrando diferente toma nan di Aruba. Chris lo duna varios tips importante pa e bishitante cu yega Aruba di bishita. Por ehempel envez di usa su cellular pa hasi yamada, e ta cumpra un karchi di telefon y asina e ta mustra con bo por economisa durante bo vakantie. Tambe e ta enfoca ariba e parti culinario di Aruba y ta combersa cu algun piscado kendenan ta mustre con pa prepara e “Catch of the day”. Tambe e ta splica encuanto di Aruba su specialidad nan culinario y ta conta cu e ta bay come cabrito cu pan bati.

E filmacion a tuma lugar tambe na diferente parti di nos isla manera California Lighthouse, Kapel di Alto Vista, Bushiribana y Casibari. E casnan den forma di cas tipico di Aruba situa na Calabas a sirbi tambe como “background” di e seccion di tradición.
Alaves a laga e ekipo filma den centro di Oranjestad como lugar colorido cu tiendanan luhoso pa asina mustra e turista Europeo cu na Aruba tambe tin tienda di marcanan exclusivo.

Parti luhoso di Aruba:
E grupo a usa Renaisance Aruba Resort pa ilustra e parti luhoso di Aruba. E ekipo completo a hospeda na Renaissance Aruba Resort caminda nan diferente filmacion a tuma lugar tanto na e resort, na Seaport Marketplace y e riba e isla priva di Renaissance.