Colegio E.P.I. Sector di Hospitalidad & Turismo den cooperación cu EPB, Aruba Tourism Authority, Aruba Hotel and Tourism Association y tambe Aruba Gastronomic Association, ta den full preparación cu e organización di e proximo “Aruba Internacional Student Culinary Expo 2008”. E evento, lo tin como meta principal pa trece studiantenan tanto local como internacional hunto y asina expone nan expertisio den e ramo culinario. E comisión rganizador ta kere firmemente den incentiva nos hubentud especialmente den e sector turistico, kendenan lo ta e futuro profesionalnan den e industria aki. E skolnan cu lo participa na e evento aki ta  EPI y EPB(Aruba), FEFFIK(Curacao), SBO(Bonaire).

E programa oficial lo inicia dia 16 di Maart, 2008, na unda lo bay tin e apertura Oficial den e Collegezaal di E.P.I.. Después lo sigi un sesion di orientation y tambe lo bay tin unguest speaker, kende lo bay conversa encuanto di e industria aki y e beneficionan cu esaki ta trece cu ne. Después lo sigi cu e competencianan y tambe workshops. Durante ora di anochi, Aruba Tourism Authority & Aruba Hotel and Tourism Association lo organiza un recepcion di bon bini na honor di tur e studiantenan, nan mentornan, e huradonan internacional como tambe medionan di prensa tanto local como internacional. E huradonan internacional, lo ta Chef nan reconoci di e American Culinary Federation kendenan lo ta responsable pa saka e equipo ganador den e diferente categorianan.

E programa lo continua dia 17 di Maart cu otro dia di competencia y workshop. Después di esaki e studiantenan lo disfruta di un paseo cortico rond di Aruba pa asina yudanan kita un tiki di e tension di e competencia den un ambiente ameno. Durante parti di atardi, e grupo completo di studiante lo bay hasi un Back Of The House Tour & Dinner, cual lo encera tira un vista den e cushina na algun restaurant cu ta miembro di Aruba Gastronomic Association. Meta di esaki ta pa asina logra haña un impresión di con un cushina di un top restaurant na Aruba ta funciona. E atardi lo culmina cu un cena pa henter e grupo.

E dia importante pa tanto e alumnonan como tambe tur persona cu ta gusta purba bon cuminda, lo bira dia 18 di Maart, na unda for di 12:00 -5:00 PM, e studiantenan lo tin e oportunidad pa expone nan platonan na tur presente. Tambe lo bai tin diferente tipo di entretenimiento y e oportunidad di cumpra cuminda y bebida, en connecion cu e dia nacional aki, mezclando un tiki di nos cultura cu nos hubentud. E Culinary EXPO aki lo tuma lugar ariba e patio amplio di EPI Hospitalidad y Turismo. Esnan interesa pa tin un tent pa ofrecde na publico nan productonan ta mas cu bon bini pa participa.

Ariba e mesun dia aki, for di  8:00 PM en adelante, lo bay tin e grandioso “Awards Night” cual lo carga e nomber “A taste of Aruba” na unda publico en general por bin presencia e resultadonan di e competencia y wak cua equipo lo bira ganador absoluto di e grandioso premio cual ta e participación na e National Convention di e American Culinary Federation cu lo tuma lugar e aña aki na Las Vegas, Nevada. Pa yuda recauda fondo pa yuda e equipo ganador y continua cu e tremendo competencia aki, lo bende ticket di entrada pa e “Awards Night” na un valor di Afls 50,- p/p. Durante e anochi aki lo por disfruta di bebida y di diferente platonan ofreci pa entre otro e diferente prestigioso restaurant miembronan di Aruba Gastronomic Association.

E comisión organizador kier a tuma e oportunidad tambe pa gradici Tiarra Air, cu e prijs special cu nan a ofrece na e participantenan internacional, tambe na The Mill Resort, kende ta contribui cu e kambernan pa e huradonan di American Culinary Federation cu lo supervisa e competencia, y tambe e prensa local y internacional. Tambe un palabra di danki na Aruba Adventures cu nan Kookukunukoo Bus y tambe e gerencia di Coconut Inn, kende a ofrece un prijs hopi special na tur e studiantenan y nan familiaresnan.

Un biaha mas Colegio EPI, EPB, Aruba Tourism Authority, Aruba Hotel and Tourism Association y tambe Aruba Gastronomic Association kier tambe gradici un y tur cu te awor a duna nan aporte pa cu e evento aki.  Pa por hasi un evento di tal magnitud naturalmente ta rekeri e coperacion di industria en general. Pa e motibo aki si tin cualkier compania of organizacion cu kier contribui of aporta na e futuro generacion di nos industria di hospitalidad y turismo, of cu kier ricibi cualkier información di e evento, por tuma contacto libremente cu Sr. Ryan Maduro, Opleidingsmanager na EPI unidad Hospitalidad y Turismo na telefon 5258713, 5624924, of na e-mail rmaduro.epi@hotmail.com of aisce2008@hotmail.com