Recientemente, Señores Violet Lickness, Ken y Gerola Scholl, Girolama Y Filippo Mannino, Lisa y Rene Mathieu a wordo honra como huesped distingui di Aruba , como tambe Rosalie y Frank Lo Piccolo, Margit y Donald Wybenga y Shirley y Bob Werner kende nan a wordo honra como Embahador di bon boluntad pa e isla di Aruba.

E acto di entrega a tuma lugar na La Cabana Resort, e hotel unda nan ta hospedando. E pareha nan aki tin mas cu 10 aña consecutivo ta bishitando nos dushi isla di Aruba, nan a bishita varios destinacionan rond di mundo y semper a considera Aruba como e number un.

Tambe nan a comenta cu Aruba ta nan di dos cas y un di e motibonan pa cual nan ta bin bek tur aña ta pa nos hendenan amabel, hospitalario y tambe pa e seguridad cu ta reina na e pida baranca aki. Nan a trese diferente famia y amistades den transcurso di añanan pa asina nan tambe por sera conoci cu e paraiso Aruba.

Presente tawata representante Ena Vrolijk y Betty Colman di La Cabana Resort como tambe Rayon Koolman, respresentante di Direcion di Turismo.