January 7th, 2010 “ATA ta sumamente contento cu e reaccion positivo di parti di e clientenan cu a participa na e seminario”
Recientemente, Aruba Tourism Authority a ofrece un seminario importante, conoci como e Aruba Certified Expert Seminar pa un total di 23 cliente di e Centro di Rehabilitacion Sero Colorado. Esaki a forma parti di ATA su plan di concientización pa yuda mehora nos calidad di turismo den su totalidad. Den varios ocacion Aruba Tourism Authority a ricibi e pregunta, kiko nan ta hasi pa yuda e problema di adiccion cu den cierto ocacion ta conduci na situación nan peor cu ta afecta nos comunidad y turismo. Pa e motibo aki, ATA a propone na e Gerencia di e Centro Sero Colorado pa wak si nan ATA lo por presenta e seminario aki na nan cliente nan y asina concientiza nan encuanto di e importancia di nos turismo y con cada uno di nan por yuda Aruba su turismo di un manera positivo.
E “ACE certification seminar” ta encera tur informacion concreto di loke ta producto turistico di Aruba como tambe un splicacion kico ta e tareanan di ATA pa asina tur persona por compronde con ATA ta funciona y kiko ta su responsabilidadnan pa promove nos turismo. E training aki inicialmente tawata wordo duna na solamente na agentenan di viahe den e mercadonan cu ATA ta activo, pa asina nan lo por bende Aruba mas mihor. Pero na cierto momento e gerencia di ATA a sinti e necesidad pa duna un training cu lo mehora e calidad di servicio y alavez duna información importante pa asegura cu henter nos comunidad por duna información na un manera consistente. Pa e motibo aki, ATA a introduci e seminario aki pa henter e comunidad Arubano y ya tin un cantidad grandi di compania y organizaciónnan cu a participa na e seminario nan aki.
E seminario a tuma lugar na e centro mes y a wordo dirigi pa Sra. Nathalie Maduro conjuntamente cu Sr. Mario Arends, Ehecutivonan pa Aruba Tourism Authority. Mester remarca cu durante e seminario, e cliente nan a mustra un interes enorme den e seminario. Durante e seminario por a ripara cu varios di e clientenan ta persona cu ta conta anteriormente cu mas di 15 ana di servicio den e sector hotelero of di turismo y a comparti hopi información valioso cu tur presente durante e seminario.
Na final tur participante a hasi un examen cu resultado positivo y a ricibi un certificado como muestra di nan participación na e seminario. “Nos ta kere den un segundo oportunidad y awe nos di ATA a duna boso información importante cual boso por uza como un herment valioso pa cuminsa cu boso bida nobo di un manera positivo” tawata e mensahe nan cu cual Sra. Nathalie Maduro, a expresa na tur presente. Mientras cu Sr. Mario Arends, na su turno a gradici tur esnan presente y a desea nan hopi éxito cu e programa y pa futuro.
Aruba Tourism Authority pa medio di esaki tambe kier a gradici e gerencia completo y especialmente tur e clientenan pa nan atención y participación na e seminario aki y desea nan tur clase di éxito den futuro.
PERSONA DI CONTACTO:
Sra. Nathalie Maduro
Aruba Tourism Authority
Educational Manager
n.maduro@aruba.com
5823777 EXT 250
