Nan tin 20 aña consecutivo cu nan ta bishitando nos isla

Oranjestad—Na Marriott Resort & Stellaris Casino recientemente a honra Sr. Dicky y Sra. Boyke Deumer como Embahador di Bon Boluntad. Gobierno di Aruba a duna reconocimento na e pareha Deumer pa nan 20 aña consecutivo cu nan ta bishitando nos isla.

E pareha Deumer ta residencia na Ontario, Canada, pero nan ta Hulandes di nacimento y for di aña 1951 nan a immigra na Canada. E pareha a keda masha contento di a ser honra pa gobierno di Aruba. Nan a relata cu nan promer bishita na Aruba tabata na aña 1987. For di temporada ey, nan ta bishita Aruba hasta dos vez pa aña. Marriott Resort ta e hotel unda e pareha a hospeda e ultimo 10 aña.

A ser comenta cu nan tin un sitio aparta pa tuma solo y por menciona cu Sr. Dicky Deumer tin hasta hopi suerte den e casino di Marriott. E pareha Deumer a expresa cu nan ta gusta entre otro e clima y solo di nos isla, e atmosphera cariñoso, cu Aruba ta un isla Hulandes liber di crimen, y sigur e hospitalidad cu ta ponebo sinti semper na cas.

Sr. Castro Perez, representante di ATA tabata presente pa duna un discurso y gradici e pareha pa nan lealtad y aprecio demostra na nos isla, esaki tabata den presencia di e staff di Marriott Resort.