Recientemente na Bucuti Beach Resort a wordo honra como bishitante distingui pa e isla di Aruba, Sr. Dave y Sra. Merge Renken. E pareha aki ta originalmente for di e estado di Connecticut y ta bishitando Aruba for di aña 2005. Nan ta encanta cu e isla di Aruba principalmente pa e hendenan amabel y servicial. Sr. Dave ta conta con e la wak e isla aki desarolla turisticamente den transcurso di ananan y ta contento di a forma parti di esaki.

Desde nan prome bishita semper e pareha aki a hospeda den e area di low rise, nan a yega di hospeda na casi tur hotel cu ta situa riba Eagle Beach. Nan a asegura cu nan lo sigui bishita Aruba pa hopi ana mas paso semper nan a sinti nan na nan gusto. Presente na e acto di entregamento di certificado tawata Sra. Deborah Dintelman, Resort Manager di Bucuti Beach Resort y Sjeidy Feliciano di direcion di turismo di Aruba.