“Esaki ta representa un bon oportunidad mirando e circulacion di “Interval World Readers”

Oranjestad,– Recientemente tawata di bishita na Aruba Sra. Suzanne Carmel, kende ta scirbi pa un revista sumamente conoci den e mundo di propiedadnan di timeshare, esta “Interval World Readers”.

E revista aki tin un circulación di aproximadamente un million na Merca so, como tambe miles den e area di Europa. Aruba Tourism Authority, na momento cu a ricibi e petición di e editora pa bishita nos isla, a mira e oportunidad pa promove Aruba den e revista aki. Finalmente a keda confirma cu nos isla lo ricibi un cobertura di cinco pagina, cual lo encera un cantidad di informacion general como tambe e diferente actividad nan cu tin disponibel.

Sjeidy Feliciano, Relacionista Publico pa ATA tabata encarga cu e periodista y cu e coordinación completo di su programa. Pa asegura cu e editora a logra cubri tur cos, un programa intensivo di tres dia a wordo prepara pa asina Suzanne por haya un impresión completo di tur loke tin di hasi na Aruba. E periodista a hospeda na e prestigioso Aruba Marriott Resort & Stellaris Casino na unda cu tambe e la haya e oportunidad di disfruta di un massage relahante na Mandara Spa.

E parti culinario tambe a wordo cubri na unda cu e periodista a haya e oportunidad di disfruta di un variacion di cuminda cu ta wordo ofreci rond di nos isla. E restaurantnan cu a wordo bishita tawata Papiamento Restaurant, Moomba Beach Restaurant, Pincho’s Bar & Grill y tambe Rumba Restaurant.

Alaves a duna atención na e diverso actividadnan den e itinerario manera entre otro bishita na museo historico na unda cu Suzanne a sina un tiki mas di nos historia y nos antepasadonan. Tambe e la haña e oportunidad di hasi e tan popular Seatrek ariba De Palm Island y por ultimo e la “hike” den compania di e conocido, Sr. Eddie Croes di Nature Sensitive hiking tours, na unda ela conoce un tiki di Aruba su flora y fauna y por a hasi tur tipo di pregunta encuanto di esaki nan.

Suzanne a keda sumamente contento cu e atención brinda y tambe cu Aruba y pa medio di esaki tambe, Direccion di Turismo kier a extende un danki na tur esnan cu a juda den un manera of otro pa hasi e bishita aki uno hopi placentero y fructifero.