Read in English Leer en Español
Aruba Tourism Authority cu orguyo ta presenta un proyecto extraordinario pa duna homenahe na e historia rico di Carnaval di Aruba. Nos ta hopi entusiasma pa anuncia un orkesta di steelpan cu lo habri cuater parada importante den e celebracion di Aruba su Carnaval. E paradanan aki ta inclui Lighting Parade Oranjestad, Parada di Luz San Nicolas, Parada Grandi San Nicolas, y Parada Grandi Oranjestad.
Den colaboracion cu fundacion Go Cultura, cu a planifica, produci y ehecuta e proyecto aki cu hopi detaye, nos ta sinti nos mes honra di forma un aliansa cu e steelband mas bieu di Aruba, e legendarionan: The Aruba Invaders, e campeonnan di mas di 70 aña. Nan no a solamente domina e arte di musica, pero semper nan a dedica nan mes tambe pa traspasa nan conocemento y herencia musical na e generacionnan nobo.
Prepara bo mes pa un biahe musical magico a traves di tempo mientras The Aruba Invaders ta presenta e canticanan Carnavalesco di mas emblematico di tur tempo cu a captura nos curason y nos mente. Tur hende ta invita pa disfruta di e musica, filma video y saca potret di e proyecto historico aki.
E Legado di Steelband na Aruba: Un Relato y Eco di un Gran Epoca
Den e era magico di añanan ’40 di siglo pasa, e notanan emocionante di e steelpan a yega Aruba, marcando e inicio di un revolucion musical. Bao guia di maestro Trinitario Leonard Turner, “The Invaders” a surgi como e pioneronan di e revolucion musical aki, creando melodianan yena di encanto for di drumnan di petroleo di e Refineria Lago.
Imagina e scenario: hobennan inspira pa e ritmonan cu tabata vibra for di cayanan di Trinidad a bini hunto bao liderazgo di Turner na 1945. Uzando nan habilidadnan nobo, nan a transforma drumnan di petroleo cu a wordo benta afo, den instrumentonan musical maraviyoso, creando un fusion entre ritmonan Caribense cu samba, rumba y melodianan contemporaneo.
Ya na 1948, Turner oficialmente a bay den historia cu su creacion musical, "The Invaders". Nan a bira e prome Steelband profesional riba e isla. Na 1951, Vincent Bacchus, un otro pilar di e Invaders original na Trinidad, a uni forsa ku Turner, amplificando e harmonia ku tabata resona for di nan creacionnan di hero. Hunto, nan a duna bida na "The All Stars Steel Band".
Mientras cu tempo tabata avansa, Aruba a presencia e aparicion di otro maestronan di steelpan. Paul Connor a crea "Caribbean Stars", mientrastanto Dennis Jones a crea su steelband unico. Edgar Connor, un di e hobennan mas ku tabata domina e steelpan di un forma impresionante, a forma su banda na 1952, creando e caminda pa e creacion di steelbands rond di henter Aruba, cada un cu nan ritmo y estilo caracteristico.
E eco di e legado musical ta wordo nota te cu awe, entre otro a traves di Fundacion Panman Aruba, lidera pa Sr. Lee Connor, e actual lider di Aruba Invaders. E tradicion ta continua mientras Sr. Connor, hunto cu su rumannan, ta traha duro pa traspasa nan conocemento y habilidadnan na e generacionnan mas hoben.
Comparti cu nos den e celebracion di e ritmonan eterno y e spirito duradero di herencia di steelpan di Aruba!
Documentario den dos parti: Steelband: Eco di un Gran Epoca
Cla pa e Biahe Ritmico Completo?
Descubri e vibrante historia di Aruba su steel bands di e añanan '40.
Lesa mas tocante e storia extraordinario di 1953 aki:
Esso News Vol. 14 No. 5 - Feb 27, 1953
Un Seleccion di Aruba su Clasiconan Carnavalesco 🎵
Steelpan Durante e Añanan
Un danki en especial ta bay na e siguiente organisacionnan y personanan cu a comparti nan conocemento y media:
Departamento Arubiana-Caribiana di Biblioteca Nacional Aruba (Sra. Graciela Nedd-Cheng): https://www.bna.aw/digital
Archivo Nacional di Aruba, Aruba's National Archive: https://coleccion.aw
Sra. Maybelline Arends-Croes
Rebecca Roos Productions: https://www.youtube.com/RoosProd
